لو حد قالك فى الشارع إنت ديماجوجي دى تبأه شتيمة ولا حاجة حلوة..!!
2 مشترك
كاتب الموضوع
رسالة
محمد القطب عضو خبير
عدد الرسائل : 455 نقاط : 43 تاريخ التسجيل : 27/06/2008
موضوع: لو حد قالك فى الشارع إنت ديماجوجي دى تبأه شتيمة ولا حاجة حلوة..!! الأربعاء يناير 28, 2009 11:08 pm
أجدع حاجه عندنا فى مصر إن لما فيه فكرة بتنجح تلاقي مليون واحد عمال يكررها حتى ولو كانت الفكرة دى خلاص فقدت بريقها .. يعنى لما ظهرت فكرة محلات (النت كافيه) بأه خلاص فى الشارع بتاعك خمسة أو ستة محلات نت كافيه... ورغم انه بدأ كمشروع مربح إلا أنه دلوقت مبأش زى الأول .. ولما طلعت فكرة البطاقة الصحية العائلية اللى بيعملها مجموعة دكاترة مع بعضهم من مختلف التخصصات ويوزعوا البطاقات دى على المنازل مقابل مثلا 10 او 20 جنيه ثمن البطاقة فى الوقت اللى ممكن اى حامل للبطاقة دى يكشف عن أى دكتور منهم من أى تخصص مقابل نص الكشف فقط حقق المشروع ده فى بدايته أرباح رائعة لكن دخل فى العملية مجموعات تانية كتيرة حاولت تقليد الفكرة مما أفقد المشروع ربحيته ..
وبرضه لما كانت الموجه فى التسعينات المجلات والجرائد الثقافية واللى مهتمة بس بقضايا الجنس وتلاقي كده عند بتاع الجرايد الصور العريانة مهفهفة على أغلفة المجلات والجرايد والعيال المراهقين شغالين شراء على ودنه كانت مربحه ليهم ومع الوقت ومع انتشار الكمبيوتر وكله اصبح على عينك يا تاجر واصبح كتير من المراهقين مكبرين دماغهم من المجلات دي ومع إنتشار موجه المعارضه السياسية حتى اصبحت الجريدة الاكثر معارضه هى اللى بتبيع أكتر فى ضوء ده كله تحولت كتير من الجرايد الصفراء الجنسية إلى جرايد سياسية معارضه .. وبدل ما كانت الصور العريانة بتتصدر الصفحات الاولى اصبح الهجوم السياسي هو البديل ..
العملية بس أولا واخيرا بزنس ولو دققت النظر كده فى جريدة مشهورة جدا فى المعارضه وبصيت للى بيمولوها حتلاقيهم كلهم رجال أعمال ليهم مصالحهم وهم جزء لا يتجزأ من النظام اللى بيهاجموه .. وخد عندك كمان برامج التوك شو لما نجح أول برنامج توك شو طلع عندنا بعدها إتنين وتلاته وأربعه وكله فى الاخر لك على عك وصداع فى صداع ولا بيقدم ولا بيأخر .. اصبحت برامج التوك شو مسرح للى عاملين نفسهم مثقفين لإستعراض عضلاتهم فى إستخدام الفاظ مجعلصه يعنى فى احد البرامج الحوارية الساخنة كانت فى اتنين بيتناقشوا أو بمعنى اصح بيتعاركوا والمذيع واقف لايص وعمال يقول لده ( سوف اعطيك المجال ) ويهدى فى التاني ويقوله ( سوف اعطيك المجال) ، لكن لا ده بيسمع ده ولا التاني معبره ، ومع إشتداد المعركة الكلامية بين الاتنين واحد منهم قال للتاني ( إنت ديماجوجي ) ، فالتاني رد عليه بسرعة وهو منفعل قايله ( ده انت اللى ديماجوجي وستين ديماجوجي ) .. يا نهار ابيض يا ناس ( ديماجوجي)!! ..دى العالم دى بتشتم بعضها بالثقافة .. طب اللى قاعد قدام التليفزيون ده حيسأل نفسه ( إيه ديماجوجي دى يا خويا !) ..
الناس دى بستعرض وخلاص هى شغلتها كده اللت والعجن من غير ما يستفيد عامة الناس منهم بحاجه .. فالديماجوجية لاتينية فى الاصل بيقولوها على اللى بيستخدم الشعارات والحيل السياسية لخداع الجماهير .. طب عم جابر وعم متولى والناس البسيطة دي اللى قاعدة قدام التليفزيون علشان تخرج بحل لمشكلة فى حياتها او تعرف اللى بيجرى حواليا حيعرفوا المصطلحات العقيمة دي منين .. العملية كلها أصبحت بزنس توك شو أو حتى جرايد .. فخلى بالك بأه لو حد قالك فى الشارع انت ديماجوجي دى كلمة وحشة مش حلوة وطبعا جنابك عارف حترد عليه بإيه حتقوله ( انت اللى ديماجوجي وستين ديماجوجي ) .
بقلمي
قاتل مأجور عضو سوبر
عدد الرسائل : 1251 نقاط : 1262 تاريخ التسجيل : 10/06/2010
موضوع: رد: لو حد قالك فى الشارع إنت ديماجوجي دى تبأه شتيمة ولا حاجة حلوة..!! الخميس يونيو 17, 2010 4:21 pm
مشكور على الموضوع
لو حد قالك فى الشارع إنت ديماجوجي دى تبأه شتيمة ولا حاجة حلوة..!!