أحدث وظيفة للشباب: سرقة الموبايلات في الشوارع والاماكن العامة وكمان المدارس المؤهلات المطلوبة: إيد خفيفة على محل موبايلات أكيد عشان يلحق يسوق المنتجات بسرعة كده خفيف خفيف وياريت لو موتوسيكل ولو فيسبا ميضرش برضه ويكون عنده نسكافيه في البيت عشان يصحى الصبح عامل دماغ ورايق البال ويخلي الدماغ صاحي
اللي قولته ده مش اعلان في مجلة ولا جرنال ولا حتى كاتالوج وظايف بس اكيد هيتضاف قريب يعني متقلقوش بس اللي قلته ده واقع حقيقي بجد بيحصل حوالينا الصبح كده في وضح النهار وكل الناس شايفين انا بيتهيألي سرقة الموبايلات حاليا بقت وظيفة معتمدة تلاقي العصابات اللي بتنظم الشغل ده شيء اكيد عشان ميحصلش ازمة لأن الشغلان رائجة جدا حاليا مش ناقص غير حاجة واحدة انهم يعملوا نقابة عشان حرامية الموبايلات اصلهم مش بيسرقوا فلوس دول بيسرقوا موبايلات بس يعيني ومحتاجين حد يدافع عن حقوقهم ويبقى ليهم معاش وتأمين صحي واهم من ده كله تأمين على الحياة عشان الشغلانة ديه خطرة ولو حصلت اصابات في العمل لازم يلاقوا رعاية طبية وتعويض واانا من رأيي يسموا النقابة ديه نقابة "خد الموبايل واجري" ولا ايه رأيكوا؟!!
حقيقي من غير سخرية: المشكلة كبيرة اوي وخطيرة كفاية بس احساس الانسان العادي وهوا ماشي بانعدام الامن هتخاف تتسرق في وضح النهار كده ومتعرفش تتصرف او هتتصدم اساسا مش هتلحق تتصرف ، بس تعرفوا لو فكرنا من الجانب الاخر وحاولنا نفكر زي ما اللي بيسرقوا دول إيه اللي بيخليهم يسرقوا؟؟؟ اكيد طبعا لقوا نفسهم من غير شغلة ولا مشغلة يعني يقعدوا في البيت مثلا يقشروا بصل؟ لا طبعا والادهى بقى لو اللي بيسرق ده بيتعاطى حاجة ده كده بجد تبقى خربت لانه هيحتاج فلوس كتير عشان يصرف منها على نفسه وع اللي بيتعاطاه وعلى اهله ده لو اساسا عنده اهل، وده يخلينا نفكر ان احنا بجد عندنا قنابل موقوتة وشباب عنده كبت رهيب من كل اللي بيشوفوه حواليهم من ظروف لاخلاق للاحوال اللي شايفنها ،ولما الشباب بدأ بموبايلات بـ2000 و3000 جنيه في المتوسط نقول 1000 امال في المستقبل بقى هيعملوا ايه ايه تاني هيسرقوه؟؟؟اجابة بسيطة جدا تقدروا تخمنوا وتوقعوا اي حاجة لان اللي يخلي اصحاب اشرف مهنة يسرقوا الاعضاء يخلي اي مواطن ميعرفش اساسا معنى الوطن يسرق وطنه وياريت تقدر تقول عليه مواطن ده يمكن اتربى في شارع او في حارة ملقاش ولا اهل ولا احساس بالوطن حواليه بس صمم انه يلاقي شغل وفعلا لقى . وعلى فكرة انا مش بدافع عنهم يمكن انا صحبتي من المتضررين ومش اي موبايل دهN95 جديد استخدام شهر مش اكتر فالمهم ان كل واحد يحرص وياخد باله من اللي في جيبه واللي في ايده مش هتفرق كتير عشان دلوقتي زمن الفلوس ولّ وعصر الموبايل جيه وما خفي كان اعظم...........
سلاماتي ليكوا
قاتل مأجور عضو سوبر
عدد الرسائل : 1251 نقاط : 1262 تاريخ التسجيل : 10/06/2010
الأربعاء يناير 28, 2009 10:30 pm
